Dat sösstigjöhrige Abi-Drapen
13.07.2026, 10:53 Uhr
Von:
Astrid Jabs
der reporter Eutin/Malente
Unser Leser Rainer Bösel aus Gleschendorf hat uns einen besonderen Bericht über sein Abitreffen geschickt: An Oostern 1957 wöörn wi in uns Kreisstadt Eutin in de Sexta inscholt, boven vun de „Himmelsledder“, op'n Barg bi den Watertoorn, wo das Jungsgymnasium Johann-Heinrich-Voß-Schule sien Platz harr. För de Deerns geev dat de Weber-School ünnen in de Stadt.
Wi weren tweeunsömtig Jungs, opdeelt in twee Klassen, üm un bi teihn Johren oolt. Vele kemen ut Eutin, Fissau un Niedörp, annere ut Dörper un Öörd in'n wieden Ümkreis bet hen na Niestadt, Lüttenborg un Ahrensbök. Dat kunn morgens bedüden: half söss opstahn, kort mit'n Waschlappen dörch't Gesicht, beten warme Melk mit Haverflocken un Rosinen eten, mit de swore Tasch op'n Rüch na de Bahn- oder Busstatschoon lopen un na Eutin fohren. De Stadtkinner kunnen fein utslapen un to Foot oder mit't Rad na de School henkamen.
In de negen Johren weer dat jümmer wedder en Kamen un Gahn. Wokeen sik nich an de Regeln höll oder nix för siene Noten dee, müss sik en anner School söken. Ok geev dat domals niege Schoolgrünnen wie to'n Bispeel in Niestadt, wodörch Schölers aftrocken wöörn. Vele Mitschölers güngen mit de "Mittlere Reife" af to en anner School oder in de Lehr.
Na de eersten dree Johren kemen wie all tohoop in een Klass. Aver wi harrn deelwies ünnerscheedlichen Ünnerricht, Latein oder Französisch, Physik oder Chemie. Ok twischen Musik un Kunst müssen wi uns toletzt noch fastleggen.
All poor Johren weren Klassenfohrten anseggt: na Sylt, in't Sauerland, na Südtirol un in dat gedeelt Berlin. As wi 1966 den Afsluss kregen, weren wi blots noch 21!
Na 26 Johren hebbt wi uns dat eerste Mal mit poor Lehrers vun fröher drapen. De meisten vun uns weren dorbi. Wi hebbt de School un de Stadt weddersehn, veel vertellt un tosamen eten. Sietdem hebbt wi uns in gröttere Afstänn drapen.
Nu wullen wi dat sösstig Johren na dat Abi nochmal versöken. Nich all sünd hüüt noch an't Leven oder ehr Adress is unbekannt. Männicheen is krank oder wahnt to wiet weg. Man wi hebbt dat doch noch henkregen - mit söven Mannslüüd to'n Sösstigsten. Un dat hett uns bannig goot gefullen!
